عالمی اقتصادی پابندیوں اور ایران کی اقتصادی ترقی

موسی  رضا

یہ تاثر درست نہیں ہے کہ ایران کو عالمی اقتصادی پابندیوں کے باعث کسی بڑی مشکل کا سامنا ہے، ایران پر یہ پابندی پہلی مرتبہ نہیں بلکہ ایران عراق جنگ کے دوران بھی لگ چکی ہے اور ایران نے ان پابندیوں سے نمٹنے کا طریقہ ایجاد کر لیا ہے۔ ایران عالمی اقتصادی پابندیوں کے باوجود دنیا بھر کے ممالک سے درآمدات و برآمدات کرنے کا تجربہ رکھتا ہے- امریکا گذشتہ تین عشروں سے زائد عرصے سے دہشتگردی کی حمایت اور جوہری ہتھیار بنانے کی کوشش کا الزام لگاکر ایران پر زیادہ سے زیادہ دباؤ ڈال رہا ہے یہاں تک کہ اس نے بیرون ملک امریکی بینکوں میں ایرانی اثاثے بھی منجمد کردیئے ہیں اور یہ اقدامات غیر قانونی ہونے کے باوجود وہ اپنی یہ دشمنانہ پالیسی، جاری رکھنے پر تاکید کررہا ہے۔  2012ء میں امریکہ اور یوروپی یونین نے ایران کے پرامن جوہری پروگرام کے سلسلے میں اس پر توانائی کے شعبوں اور مرکزی بنک پر نئی غیر قانونی پابندیاں عائد کی تھیں جس کی بین الاقوامی برادری نے کافی نکتہ چینی کی۔ ایران کے صنعتی اور توانائی شعبوں پر امریکی پابندیوں کا الٹا اثر ہوا ہے۔ جس کا ثبوت ایران کی تیزی سے بڑھ رہی برآمدات ہیں۔ اور اب امریکی کانگریس اس سلسلے میں اوباما انتظامیہ سے جواب طلب کررہی ہیں۔ امریکہ کو تشویش ہے کہ سخت پابندیوں کے اثرات عالمی معیشت پر بری طرح مرتب ہوں گے خصوصاً توانائی کی مارکیٹ پر۔ خیال رہے کہ سلامتی کونسل کے 2 مستقل ارکان چین اور روس پہلے ہی واضح کرچکے ہیں کہ وہ ایران پر نئی پابندیوں کی حمایت نہیں کریں گے۔ روس نے ایران کے اقتصادی اور توانائی کے شعبوں پر نئی امریکی پابندیوں کو’’ناقابل قبول‘‘ قرار دے کر مسترد کر دیا ہے اور کہا ہے کہ اس سے تہران کے جوہری پروگرام پر بات چیت کی تجدید کے امکانات کو نقصان پہنچے گا۔ روس طویل عرصے سے ایران کے خلاف ایسی پابندیوں کی مخالفت کرتا آیا ہے جو اقوام متحدہ کی سلامتی کونسل کی طرف سے لگائی گئی پابندیوں سے ہٹ کر ہوں اور امریکہ کی طرف سے تازہ پابندیوں پر سخت ردعمل ماسکو کے اس دیرینہ موقف کا اعادہ ہے۔ مزید برآں واشنگٹن نے 11 ایسی کمپنیوں کو بھی بلیک لسٹ کر دیا ہے جن پہ ایران کے جوہری پروگرام میں معاونت کرنے کا شبہ ہے اور ان کمپنیوں تک بھی نئی پابندیوں کا دائرہ کار بڑھا دیا ہے جو ایرانی تیل و پیٹروکیمیکل کی صنعت میں معاونت کر رہی ہیں۔

 ایران بھارت سے بھاری مقدار میں دو طرفہ تجارت کر رہا ہے اوربھارت کو آئل سپلائی کرتا ہے اور بھارت سے اپنی ضرورت کے مطابق اشیا درآمد کر لیتا ہے پاکستان کے ساتھ ایک کرنسی میں تجارت اگر ہو دوطرفہ تجارت بڑھ سکتی ہے۔ ایران کو بہت زیادہ دباؤ کا سامنا ہے اور پابندیاں بھی لگائی گئی ہیں لیکن ایران ماضی کے تجربات کو سامنے رکھتے ہوئے ہرطرح کی پابندیوں سے نمٹ سکتا ہے۔ ایران پاکستان کو ایک ہزار میگاواٹ بجلی فراہم کرنے کے لیے تمام انتظامات مکمل کر چکا ہے، پاکستان اور ایران میں تجارتی رکاوٹ کی بنیادی وجہ کرنسی ہے، اگر مشترکہ کرنسی سے کام لیا جائے تو دوطرفہ تجارت میں بے پناہ اضافے کے امکانات ہیں۔ ایران سنگل کرنسی کے لیے تمام کام مکمل کر چکا ہے اور اب اسٹیٹ بینک آف پاکستان کی جانب سے سگنل کا انتظار ہے۔ ایرانی تاجر گیس پائپ لائن اور توانائی کے منصوبوں کے علاوہ ٹیکسٹائل، فوڈ پروسیسنگ اور دیگر شعبے میں بھی مشترکہ سرمایہ کاری کرنا چاہتے ہیں ۔امریکا کو پاک ایران گیس پائپ لائن کو غیرمنطقی تحفظات ہیں ۔ پاکستان اور ایران کی موجودہ درآمدات و برآمدات نہ ہونے کے برابر ہے اور اگر اس پر مثبت کوشش کی جائے تو تجارتی حجم 5 ارب ڈالر سے بڑھ سکتا ہے۔ ایران پاکستان گیس پائپ لائن منصوبے  پر لاگت کا تخمینہ  ساڑھے سات ارب ڈالر لگایا گیا ہے اور منصوبے میں گیس کی ترسیل کے لیے تقریباً 28 سو کلومیٹر  طویل پائپ لائن بچھائی جائے گی۔ پائپ لائن ایران سے پاکستان میں داخل ہونے کے بعد کوسٹل ہائی وے کے ساتھ  کیرتھر رینج سے ہوتی ہوئی نواب شاہ تک جائے گی جس کے ذریعے  گیس کی رسد  2016ء سے شروع ہو گی۔ ایران سے آنے والی پائپ لائن سے جو گیس پاکستان کو ملے گی اس سے پاکستان کی ایک تہائی انرجی ضروریات پوری ہوسکیں گی۔

 امریکی حکام کو ڈر ہے کہ نئی پابندیاں ایران کی نظر میں جنگ کا اعلان ہوں گی جس سے وہاں شدت پسند عناصر کا اثر رسوخ بڑھے گا اور امریکی و مغربی اہداف پر حملوں کی حوصلہ افزائی ہوگی۔امریکہ کو یہ بھی خوف ہے کہ ایران پابندیوں کو بے اثر کرنے کے لئے آبنائے ہرمز سے خام تیل کے ٹینکرز کی آمدورفت روک دے گا اس وقت دنیا کا 40 فیصد تیل اسی تنگ سمندری راستے سے ہوکر گزرتا ہے- بعض ملکوں کو ایران کے خلاف پابندی سے مستثنی رکھنے کا اعلان کیا اور کہا ہے کہ چین، ہندوستان، ملائیشیا، جنوبی کوریا، سنگاپور، جنوبی افریقہ، سری لنکا، ترکی اور تا‏ئیوان، ایران سے تیل کی درآمدات میں کمی رکھنے کی بناء پر تہران کے خلاف واشنگٹن کی پابندیوں سے مزید چھے ماہ تک مستثنی رہیں گے۔ البتہ جن ممالک نے ایران کا بائیکاٹ کیا ہے وہ خود مختلف قسم کے اقتصادی مسا‏‏ئل سے دوچار ہیں جبکہ یورپی ملکوں اور امریکا کے اتحادی ملکوں کی اقتصادی ترقی کی شرح اس حد تک گھٹ چکی ہے کہ ان ملکوں کے عوام، بے روزگاری، اقصادی جمود اور بڑھتی ہوئی افراط زر سے تنگ آچکے ہیں۔ ایران کا بائیکاٹ، تہران کے خلاف واشنگٹن کا صرف ایک دشمنانہ اقدام ہے۔ اس نے ایران کے صدارتی انتخابات کے موقع پر تہران کے خلاف بہت سے اقدامات کو عمل میں لانے کا فیصلہ کیا ہے تاکہ ایرانی عوام کو نظام اسلامی سے دور کیا جاسکے تاہم ایران کے اسلامی انقلاب کی کامیابی کے چونتیس برسوں کے تجربے سے اس بات کی نشاندہی ہوتی ہے کہ ایرانی قوم کے دشمن، تہران کے خلاف نہ صرف پابندیوں بلکہ ایران کے اسلامی نظام کے خلاف ابتک اپنی کسی بھی سازش میں کامیاب نہیں ہوسکے ہیں۔ امریکہ کے ایماء  اور حوصلہ افزائی کے تحت ہی ایران پر اقتصادی پابندیاں عائد کی گئیں جن کا سلسلہ ہنوز جاری ہے لیکن ایران نے امریکہ اور اسرائیل ، دونوں ہی کو یہ باور کرا دیا ہے کہ وہ ان کے سامنے کبھی سرنگوں نہیں ہو گا ۔ ایران نے ان اقتصادی پابندیوں کے اثرات سے خود کو محفوظ رکھنے کے لئے متبادل راستے اختیار کر رکھے ہیں جن میں سے ایک یہ بھی ہے کہ دوست اور خاص طور پر پڑوسی ممالک کے ساتھ تجارتی تعلقات کو فروغ دیا جائے ۔ اس سلسلہ میں تہران نے پاکستان ، چین ، بھارت ، افغانستان ، شام ، لبنان، مصر اور خلیجی ریاستوں کے ساتھ نہ صرف سفارتی سطح پر بلکہ دو طرفہ امور کے باب میں بھی نہایت حوصلہ افزائ پیش رفت کی ہے ۔ پاکستان کے ساتھ تو ایران کے دیرینہ اور دوستانہ تعلقات ہیں چنانچہ ’’پاک ایران گیس پائپ لائن‘‘ کے منصوبے پر تیزی سے عمل کیا جا رہا ہے ۔ حال ہی میں وزیراعظم نواز شریف کے دورہ چین کے دوران چینی قیادت کی طرف سے دو ٹوک الفاظ میں اس خواہش کا اظہار کیا گیا کہ مذکورہ پائپ لائن کو توسیع دے کر چین تک لایا جائے اور اس سلسلہ میں چین ہر ممکن امداد اور تعاون فراہم کرے گا ۔
تہران نے اپنی حقیقت پسندانہ اقتصادی اور معاشی پالیسیوں کے نتیجہ میں جو سیاسی استحکام اور شہرت حاصل کی اس کا اندازہ یوں کیا جا سکتا ہے کہ حال ہی میں اقوام متحدہ کی جاری کردہ ایک رپورٹ میں نشاندہی کی گئی ہے کہ گذشتہ سال یعنی 2012ءمیں ایران میں غیر ملکی سرمایہ کاری میں3/17   فیصد اضافہ ریکارڈ کیا گیا ۔ رپورٹ کے مطابق بعض عالمی طاقتوں کے سیاسی دباؤاور اقتصادی پابندیوں کے باوجود مذکورہ سال کے دوران ایران میں غیر ملکی سرمایہ کاروں کی طرف سے 48ارب ڈالر سے زائد کی سرمایہ کاری کی گئی۔ اس واقعہ کی روشنی میں حقیقت پسند مبصرین کی طرف سے اعتراف کیا جا رہا ہے کہ امریکی پابندیاں ایران کا بال بھی بھیکا نہیں کر سکیں۔ گذشتہ دنوں عالمی حلقوں اور خاص طور پر سفارتی دنیا میں اس وقت خوشگوار حیرت پھیل گئی جب اقوا م متحدہ نے تصدیق کرتے ہوئے اعتراف کیا کہ ایران اور شمالی کوریا کے درمیان میزائل ٹیکنالوجی کے شعبے میں تعاون سے متعلق کوئی شواہد نہیں ملے ہیں۔ جنوبی کوریا کے اخبار ’’ایرنگ نیوز ‘‘کی رپورٹ کے مطابق یو این سیکورٹی کونسل کی ایران سے متعلق کمیٹی پینل نے تصدیق کی کہ ایران اور شمالی کوریا کے درمیان طویل فاصلے تک مار کرنے والے میزائلوں کی ترقی اور ٹیکنالوجی کے شعبہ میں تعاون کے حوالے سے کوئی شواہد نہیں ملے ہیں۔ 12اکتوبر 2012ء کو شمالی کوریا نے ایک موسمیاتی سیارچہ خلاء  میں بھیجا تھا اور جاپان نے الزام عائد کیا تھا کہ ایران نے اکتوبر میں شمالی کوریا کو دفاعی سٹاف بھیج دیا تھا۔ جاپانی میڈیا نے بھی کہا تھا کہ میزائل تجربے کے وقت ایرانی وزارت دفاع کے افسران وہاں پر موجود تھے ۔
دنیا بھر کے سفارتی حلقوں اور عالمی اداروں میں یہ تاثر عام ہے کہ ایرانی ایٹمی پروگرام کی تحقیقات کرنے والی اقوام متحدہ کی ایٹمی ایجنسی کا انحصار امریکہ اور اس کے اتحادیوں پر ہے جس کی وجہ سے ایجنسی کو اپنی رپورٹ کو عالمی سطح پر قابل قبول بنانے میں دشواری کا سامنا ہے۔ دنیا کے بیشتر ممالک ہتھیاروں سے متعلق امریکی ایجنسیوں کی معلومات کو شک کی نگاہ سے دیکھتے ہیں کیونکہ ایک دہائی قبل امریکی خفیہ ایجنسیوں نے عراق پر بڑ ی تباہی پھیلانے والے ہتھیاروںکی تیاری کا الزام لگایا تھا جس کی بنیاد پر امریکہ نے عراق پر حملہ کر دیا تھا، بعد میں یہ بات ثابت ہوئی کہ عراق میں ایسے ہتھیار موجود نہیں تھے ۔ ان حالات اور واقعات کو مدنظر رکھتے ہوئے وثوق سے کہا جا سکتا ہے کہ ایران اور امریکہ کی چپقلش میں امریکہ کو اخلاقی سطح پر رسوائی اور جگ ہنسائی کے سوا کچھ ہاتھ نہیں آیا جبکہ ایران نے مہذب اور پرامن دنیا کو اپنے رویہ ، طرز احساس اور حکمت عملی سے مائل اور قائل ضرور کیا ہے ۔ میرے حساب سے دراصل امریکہ اسرائیل کے ساتھ مل کر پہلے دن ہی ایران کو نشانہ بنانے کا اعلان کر چکا ہے۔حالانکہ پانچ سال قبل جب آئی اے ای اے کے سابق سربراہ محمد البرادعی نے یہ اعلان کیا تھا کہ ایران کا ایٹمی مسئلہ حل ہو گیا ہے تو پھر آج کیا افتاد آپڑی ہے؟